ازاي نطبق الكلاسيكية علي مساحاتنا الصغيرة ...

ازاي نطبق الكلاسيك علي مساحاتنا الصغيرة ؟؟؟

زمان كانت البيوت بتتميز بالمساحات الكبيرة الواسعة عشان كده كانت قادرة تستوعب قطع الاثاث الكلاسيك واللى بتتميز بالضخامة فى الحجم , اما فى الفترة والزمن الحالى وكثافة السكان وكثرة المبانى وضيق المنازل وقلة الإمكانيات مقابل ارتفاع الأسعار قل الطلب كتييييير اوووووى على الديكور الكلاسيك ... لكن عشاق الكلاسيكية لسه موجودين ... أغلب الشباب من عشاق الكلاسيك بيفضلوا المزج بين الكلاسيكية في الريسبشن والمودرن في المعيشة وغرف النوم ...

الكلاسيك بالمعنى الحرفي لتفاصيله ورسوماته واثاثه مبنعرفش نديله حقه الا في الفلل والقصور لكن تعالوا نفرش شقة من شققنا كلاسيك .. ونبدأ مع بعض نطبق عملي .

* مبدأيا مفيش حاجة اسمها شقتى لويسيز او لوي كان .. يعنى ببساطة انا اقدر في ديكوري الكلاسيك اجمع بين طرز متعددة أحيانا بتوصل اني احط مع الطراز الفرنسي حاجة امبراطوري او حتة انجليزي .. بطريقة فيها فن وذوق ...

*الكلاسيك مش بحجم اثاثه الضخم ولا بالزحمة ولا باللألوان ولا بورق الحائط اللي بيبرق ...

الكلاسيك بتفاصيل كتيرة مدروسة بنسب صحيحة ومع بعض بتكون لوحة اعرف اتفرج علي تفاصليها والمها بالرغم من كترتها .

كان اهم حاجة في مساحتنا الصغيرة اننا بنعد عن الغوامق في الواننا ... تفاصيل كتير ولون ابيض من اكتر الحاجات اللي بتبقي مميزة في الكلاسيك ..

الكلاسيك مابيحبش التباين الواضح contrast... يعنى بلاش نحط كنبة اوبيسون بيج مع خلفية حمرا ...

وما احاولش اكتر من الوان الحوائط او اغير لون حائط لوحده ... لان من سمات الكلاسيكية ان عينك متركزش علي حاجة وتسيب بقيت التفاصيل .

الكرانيش هتلاقيهم في الصور بسطناها اوي وقللنا عمقها عشان تناسب ارتفاعاتنا المنخفضة والبانوهات موجودة بس بسطناها واكتفينا بالاشكال النباتية علي الاركان او في وسط البانوه من اعلي .

الرخام الابيض اللي ممكن نبدله طبعا ببورسالين ليه نفس تجزيعة الرخام عشان يدينا ايحاء بالاتساع .. ممكن اعمل الارضيات باركيه وان كنا في اغلب الاحيان مش بنفضلها كأرضيات للصالونات نتيجة انها عاوزة عناية خاصة ... لكن مافيش اي مانع طبعا انها تتعمل في غرف النوم ..

تعالوا نتفق ان كونسول المدخل في الكلاسيك مهم جدا .. كونسول مدهب صغير ورشيق بمراية كبيرة فوقه .... بس ممكن الغيه وابدله بمرايه كبيرة ببرواز مذهب بسيط تدينى وسع ومتخدش مساحة . وممكن اخلي الحائط كله مراية متقسمة مربعات مع كونسول صغير علي المراية وبكده اكون اديت المدخل اقسي اتساع ..

الدفاية اللي حواليها 2 فوتيه حلوه ودلوقت بقي في دفايات الايثانول واللي ممكن اشكلها زي ما انا عاوزة ( انا بصراحة مش مع الدفايات العيرة ) ممكن استعيض عن ال 2 فوتيه ب 2 كنبة صغيرين (loveseat ) قدام بعض وبوضع عامودي علي الدفاية ... عشان اعمل معيشة حلوة وادي اكبر عدد من اماكن الجلوس ..

قطعة تانية مهمة جدا في الكلاسيك البايو اللي ممكن احطه بعد المدخل بشوية او احطه في طرقه او حطه مابين 2 صالون جنب بعض .

الشازلونج من القطع المهمة برده اللي بقدر اربط بيها بين صالونين قدام بعض او احطها في كورنر لوحدها او في غرفة النوم لو في امكانية .

الصالون عبارة عن كنبة كبيرة و4 كراسي بس مفيش اي مانع انهم يبقوا 2 كرسي وده بيبقي اشيك لانه بيدي مجال مفتوح للصالون وبيخلي عندي امكانية انى احط قدامه كنبة تانية غنية ومكسية مع 2 ارم تشير صغييرين ...

حوالوا دايما تختاروا صالوناتك الفرنساوي صغيرة .. عشان نقدر نفرش اكبر عدد من القطع وننوع في الفرش ..

نيش السفرة مكنش في اساسيات الكلاسيك ( تخيلوا ) هو تقريبا اختراع مصريبس ممكن اخلق نيش جوه الحائط بشكل جميل فيه تماثل يزودلي في تفاصيل الحوائط .. ومفيش مانع من تكرار المرايات في غرفة السفرة عشان تدينى اتساع ..

مش عاوزين ننسي اهم حاجة ميزنا بيها الكلاسيك الاسبوع اللي فات ( التماثل ) و (المركزية )..

ولإضفاء لمسة الفخامة ، هانطعم ببعض القطع الكلاسيكة، كالأكسسوارات والأقمشة المزخرفة بألوان داكنة كالأحمر والأخضر و السجاد طبعا . ويمكننا كمان الأستعانة بالقطع الأنتيكة كالصواني والأباري ق الزجاجية وتوزيعها في المكان